Ezr 7 | NdeIBE | STEP | Ngemva kwalezizinto, ngesikhathi sokubusa kuka-Athakisekisi inkosi yasePhesiya, u-Ezra indodana kaSeraya, indodana ka-Azariya, indodana kaHilikhiya,

Ezra 7

U-Ezra Uza eJerusalema

1 Ngemva kwalezizinto, ngesikhathi sokubusa kuka-Athakisekisi inkosi yasePhesiya, u-Ezra indodana kaSeraya, indodana ka-Azariya, indodana kaHilikhiya, 2 indodana kaShaluni, indodana kaZadoki indodana ka-Ahithubi,

3 indodana ka-Amariya, indodana ka-Azariya, indodana kaMerayothi, 4 indodana kaZerahiya, indodana ka-Uzi, indodana kaBhukhi,

5 indodana ka-Abhishuwa, indodana kaFinehasi, indodana ka-Eliyazari, indodana ka-Aroni umphristi omkhulu – 6 u-Ezra lo weza evela eBhabhiloni. Wayeyisifundiswa esazi kakhulu ngoMthetho kaMosi, owawuphiwe nguJehova, uNkulunkulu ka-Israyeli. UJehova wayemuphe konke ayekucelile, ngokuba isandla sikaJehova uNkulunkulu wakhe sasiphezu kwakhe.

7 Abanye aba-Israyeli, kulabaphristi, labaLevi, labahlabeleli, labalindimasango lezinceku zethempelini labo babuya eJerusalema ngomnyaka wesikhombisa ka-Athakisekisi.

8 U-Ezra wafika eJerusalema ngenyanga yesihlanu ngomnyaka wesikhombisa wenkosi.

9 Wayeqalise uhambo lwakhe esuka eBhabhiloni ngelanga lakuqala lenyanga yokuqala, wafika eJerusalema ngelanga lakuqala lenyanga yesihlanu, ngoba isandla somusa sikaNkulunkulu sasiphezu kwakhe.

10 Ngokuba u-Ezra wayezinikele ekufundeni lokugcina uMthetho kaJehova lokufundisa izimiso zawo ko-Israyeli.

Incwadi yeNkosi u-Athakisekisi Isiya ku-Ezra

11 Nansi incwadi iNkosi u-Athakisekisi ayeyiphe u-Ezra umphristi lomfundisi, indoda eyayifundile ezindabeni zemithetho lezimiso zikaJehova ku-Israyeli:

12 Athakisekisi, inkosi yamakhosi, Ku-Ezra umphristi, umfundisi wo-Mthetho kaNkulunkulu wasezulwini: Ngiyabingelela.

13 Manje-ke ngimisa umthetho wokuthi ingqe ngubani waba-Israyeli osembusweni wami, kugoqela abaphristi labaLevi, ofisa ukuhamba lawe eJerusalema, kahambe. 14 Uthunywa yinkosi labacebisi bayo abayisikhombisa ukuba uyofunisisa ngoJuda langeJerusalema mayelana loMthetho kaNkulunkulu wakho, owuphetheyo. 15 Njalo ubothatha isiliva legolide elinikwe ngesihle yinkosi labacebisi bayo kuNkulunkulu ka-Israyeli, ohlala eJerusalema, 16 kanye lesiliva legolide lonke ongalizuza elizweni laseBhabhiloni kanye leminikelo yokuzizwela eyabantu labaphristi benikelela ithempeli likaNkulunkulu wabo eJerusalema. 17 Ngaleyomali umele uthenge izinkunzi, lezinqama, lamazinyane ezimvu amaduna, ndawonye leminikelo yabo yamabele leyokunathwayo, konke kutshiselwe e-alithareni lethempeli likaNkulunkulu wenu eJerusalema.

18 Wena labazalwane bakho abangamaJuda selingenza lokho okuyabe kufanele ngesiliva legolide eliseleyo, mayelana lentando kaNkulunkulu wenu.

19 Hambisani kuNkulunkulu weJerusalema zonke izimpahla eliziphathisiweyo ezokukhonza ethempelini likaNkulunkulu wenu. 20 Akuthi loba yini efunekayo ethempelini likaNkulunkulu wenu elifuna ukuthi izuzakale, kayidingwe ngendleko ephuma esikhwameni senkosi.

21 Mina, iNkosi Athakisekisi ngilaya bonke abaphathi besikhwama abangaphetsheya kweYufrathe ukuthi baphe u-Ezra umphristi, umfundisi woMthetho kaNkulunkulu wasezulwini ngokuphangisa loba yini ayicelayo kini –

22 kuzekube ngamathalenta esiliva alikhulu, amakhori alikhulu engqoloyi, imigqomo elikhulu yewayini, imigqomo elikhulu yamafutha e-oliva, letshwayi elingelakulinganiswa. 23 Ingqe yini emiswe nguNkulunkulu wasezulwini, kakwenziwe ngokukhuthala kusenzelwa ithempeli likaNkulunkulu wasezulwini. Kakusweleki ukuthi ulaka luze lwehliselwe phezu kwenkosi lamadodana ayo. 24 Yazini njalo ukuthi kalilamvumo yokubiza imithelo loba inkongozelo yenkosi kumbe imbadalo yokungenisa izimpahla elizweni kubaphristi, labaLevi, labahlabeleli, labalindimasango, lezinceku zethempelini loba kwezinye izisebenzi zale indlu kaNkulunkulu.

25 Yikho wena Ezra, ngokuhlakanipha olakho okukaNkulunkulu wakho, beka abathonisi labehluleli ukwahlulela kuhle bonke abantu abangaphetsheya kweYufrathe – bonke abayaziyo imithetho kaNkulunkulu wenu. Kumele ufundise labo abangayaziyo. 26 Lowo ongawulaleliyo umthetho kaNkulunkulu wenu lomthetho wenkosi ngeqiniso umele ajeziswe ngokufa, loba ngokuxotshwa, loba ngokuhluthunelwa izimpahla loba atokisiswe.

27 Udumo kalube kuJehova, uNkulunkulu wabokhokho bethu, okufakileyo enhliziyweni yenkosi ukuletha inhlonipho endlini kaJehova eJerusalema ngale indlela 28 njalo otshengise umusa wakhe kini phambi kwenkosi labeluleki bakhe lazo zonke izinduna zakhe ezilamandla. Ngenxa yokuthi isandla sikaJehova uNkulunkulu wami besiphezu kwami, ngaba lesibindi ngaqoqa amadoda angabakhokheli kwaba-Israyeli ukuthi bahambe lami.